እቲ ግዳማዊ ኮንዶም

እቲ ናይ ግዳማዊ ኮንዶም ("ናይ ደቂ ተባዕትዮ ኮንዶም"፣ "ኮንዶም" ወይ "ካፖት" ተባሂሉ'ውን ዝፍለጥ) ፣ ኣብ ልዕሊ መትሎ ዝውደ ረቂቕን ተዓጻጻፍን ንእሽቶ ከረጺት እዩ። ካብ ላቴክስ ወይ ሲንተቲክ ነገር ክስራሕ ይኽእል።

ብኸመይከ ይሰርሕ

እቲ ኮንዶም ሓንሳእ ኣብ ቦታኡ ምስ ኣተወ ኣብ መንጎ መትሎን ልፋጫዊ ሽፋናትን (ከም ኣፍ-ርሕሚ፣ ርሕሚ፣ መቐመጫ ወይ መሃንቱስ ከምኡውን ኣፍ) ብቐጥታ ካብ ምትንኻፍ ይከላኸል ነቲ ዘርኢ ወዲ ተባዕታይ ወይ ስፐርም ድማ ይዕቅቦ።

ኣጠቓቕማ

ናይ ግዳማዊ ኮንዶም ብግቡእ ምምራጽን ምዕቃብን

• እተፈላለየ ዓቐናት ናይ ግዳማዊ ኮንዶም ኣሎ። እቲ ስፍሓትን ቅርጽን ናይቲ ኮንዶም ንምቾትን ድሕንነትን ምስ ስነ-ኣካላት/ anatomie ናይ እቲ መትሎ ዝመጣጠን ክኸውን ኣለዎ ፣ (እዚ ድማ ናይ ምቕዳድ ወይ ሸተት ናይ ምባል ተኽእሎ ንምጉዳል እዩ)።

  ንዝያዳ ሓበሬታታት ኣብ : www.mysize.ch ምውካስ

• "OK" ወይ "CE" ዝብል ምልክት ጽፈት ዝሕብር ጽሕፈት ዘለዎም ኮንዶም ጥራይ ምጥቃም።
• እቲ መጠቕለሊ/መሸፈኒ ናይቲ ኮንዶም ከምዘይተበላሸወ ኣረጋግጽ። ኣብ ጸሓይ ወይ ኣብ ቁርባበሻ ናይ ገንዘብ ኣይትግደፎም። ኣብ ንእሽቶ ሳንዱቕ መሳሊ ሒዝካዮ ምኻድ ይምረጽ።
• ዕለት ምጥቃም ዝሓለፎ ወይ ዕለቱ ዝወደቐ ኤክስፓየር ዝገበረ ኮንዶም ዘይምጥቃም።
• ናይ ላቴክስ ኣለርጂ/ሓሳስያ ምስ ዘጋጥም፡ ካብ ላቴክስ ነጻ ዝኾነ ኮንዶም ኣሎ። ጥርጣረ እንተደኣ ኣልዩኩም፡ ኣብ ፋርማሲ ወይ ናብ ፍሉይ ዝኾነ ድኳን ምኽሪ ሕተቱ፣ ወይ ድማ ነቲ ኣብቲ ናይ ኮንዶም መጠቕለሊ ዝርከብ ናይ ጽሑፍ ሓበሬታ ምንባብ።

መምርሒ ኣጠቓቕማ

እቲ ኮንዶም፣ ኣብ እዋን ጾታዊ ርክብ ክንጥቀመሉ ኣሎና፣ እቲ ምውዳይ ኮንዶም ቅድሚ ምፍሳስ ዘርኢ ጥራይ ኣይኰነን። ቅድሚ ምእታዉ እውን ከይተረፈ እቲ ኣብ ጫፍ ብልዕቲ ዘሎ ፈሳሲ ጸረርታ ወይ ፕረስፐርም፣ ዘርኢ ወይውን ረኽሲ ዘመሓላልፉ ህዋሳት ክህልዎ ይኽእል እዩ። 

1. ነቲ መጥቕለሊ ብጥንቃቐ ነታ ንምኽፋት ትሕግዝ መትሓዚት/ ኣንኮሽ ተጠቒምኩም ብምኽፋት ነቲ ኮንዶም ኣውጽእዎ። ኣስተብህል፣ በሊሕ ዝኾነ ነገራት/ ጽፍሪ ወይ ነቲ መጠቕለሊ ብኣስናንካ ምኽፋት ነቲ ኮንዶም ከበላሽዎ ይኽእል። 

2.  ነቲ ናይ መትሎ ዕልቦ ወይ ዝሽፍን ቆርበት (እንተኣልዩ) ንድሕሪት ኣቢልካ ሰብስቦ ። ነቲ ናይ ኮንዶም ጫፍ ኣብ መንጎ ኣጻብዕቲ መመልከቲቶን ዓባዓባይቶን ምሓዝ። እቲ ናይ ቀለቤት ጎማ ንደገ ገጹ ብምግባር ኣብ መትሎ ኣንብሮ። በዚ ኸምዚ ድማ እቲ ኣብ ጫፍ ዘሎ መዕቆሪ ባዶ ኮይኑ ይተርፍ፣ እዚ ድማ ነቲ ዝፈስስ ዘርኢ ወዲ ተባዕታይ ቦታ ይህልዎ ማለት እዩ።

3. ነቲ ኮንዶም ንታሕቲ ምዝርዛር።

ኣብ እዋን ጾታዊ ርክብ እቲ ኮንዶም ብግቡእ ከም ኣብ ቦታኡ ከም ዝጸንሐን ከም ዘይተበላሸወን ደጋጊምካ ተቖጻጸር።

ድሕሪ ምፍሳስ ዘርኢ፣ ቅድሚ እቲ ምቕናዕ መትሎ ምቁራጹ፡ ነቲ መትሎ ምስቲ ኮንዶም ኣውጽእዎ።
ኣብ እዋን ምውጻእ ናይቲ መትሎ፣ ነቲ ኮንዶም ኣብ መንጎ ኣጻብዕቲ ዓባይዓባይቶን መመልከቲቶን ኣጽኒዕካ ምሓዝ የድሊ። ድሕሪ ምጥቃም፡ እቲ ኮንዶም ከም ዘይተበላሸወ (ከም ዘይተቐደን) ምርግጋጽ። ኣብ ሽቓቕ ዘይኮነስ ኣብ ጐሓፍ ክድርበ ይግባእ። ነቲ ኮንዶም ሓንሳብ ጥራይ ምጥቃም።

እዚ ዝስዕብ ጉዳያት ምስ ዘጋጥም...

እቲ ኮንዶም እንተደኣ ተቐዲዱ፣ ሸተት እንተደኣ ኢሉ፣ ወይ (ብግቡእ) እንተዘይተጠቒምናሉ።

ጥንሲ ምሓዝ ንምውጋድ፣ ብዝተኻእለ መጠን ብቕልጡፍ (እንተበዝሐ ክሳብ 120 ሰዓታት ድሕሪ እቲ ስጋዊ ርክብ) ፣ ክኒና ናይ ህጹጽ መከላኸሊ ጥንሲ ምውሳድ ይምከር።

ንዝያዳ ሓበሬታታት፣ ህጹጽ መከላኸሊ ጥንሲ

ሓደጋ ምትሕልላፍ ኤችኣይቪ ወይ ኤይድስ እንተ ኣጋጢሙ ፣ ነቲ ህጹጽ ሕክምና (ድሕሪ ምቅላዕ ንምክልኻል/ ፕሮፊክላሲ ፖስት አክስፖሲስዮን፣ ፐፕ ናይ ኤይድስ/PEP HIV) ዝውሰድ መድሃኒት ምውሳድ ይከኣል። ንሓደጋ ምትሕልላፍ ኤይድስ/ኤችኣይቪ ብኣድማዒ መንገዲ ንምንካይ፣ ነዚ ክንክን ሕክምና ብዝተኻእለ መጠን ብዝቐልጠፈ እዋን (እንተበዝሔ ክሳብ 48 ሰዓታት ድሕሪ ስጋዊ ርክብ) ክውሰድ ኣለዎ።

ንዝያዳ ሓበሬታታት ፣ ብጾታዊ ርክብ ዝመሓላለፉ ረኽስታት

ኣገዳሲ ሓበሬታታት

• ውሽጣውን ግዳማውን ኮንዶም ኣብ ሓደ እዋን ዘይምጥቃም፣ ምኽንያቱ እቲ ምፍሕፋሕ ምቕዳድ ከስዕብ ስለ ዝኽእል።
• ቅብኣት/ Lubrifiants፣ ካብ ማይ ወይ ካብ ሲሊኮን ብዝተመስረተ ኣሰራርሓ ዝተዳለወ ቅብኣት ምጥቃም። ስብሒ ዘለዎም ነገራት (ከም እኒ ቫዘሊን፣ ዘይቲ፣ ማርጋሪን ዝኣመሰሉ)፣ ጸረ-ዘርኢ ወዲ ተባዕታይ ከምኡ’ውን ናይ ፋንጋል ረኽሲ ፍወሳታት ነቲ ላቴክስ ናይቲ ኮንዶም ከበላሽዎ ይኽእል እዩ። ናይ ርሕሚ ወይ ናይ መሃንቱስ ክሬም ወይ ኦቩል ክንክን ሕክምና ምስ ዝወሃበኩም፣ ምስ ኣጠቓቕማ ኮንዶም ዝሰማማዕ እንተኾይኑ ንሓኪምኩም ምሕታት። እንተዘይኮይኑ ኣብ እዋን ሕክምናዊ ክንክን ስጋዊ ርክብ ምውጋድ ይግባእ።
• ንገዛእ ርእስኻ ካብ ኤይድስ/ኤች ኣይ ቪ ወይ ካብ ካልኦት ብጾታዊ ርክብ ዝመሓላለፉ ረኽስታት ክትከላኸለሉ እትኽእልሉ ዝበለጸ መገዲ ፣ ዝያዳ ድሕንነት ዘለዎ ጾታዊ ርክብ/ Safer Sex ዝወሃብ ለበዋታት ምትግባር እዩ። ሓደ ካብቲ ለበዋታት ፣ ብርሕሚ ወይ ብመቐመጫ ምእታው ኣብ ዘለዎ ጾታዊርክብ ኮንዶም ምጥቃም እዩ። 
• ብጾታዊ ርክብ ዝመሓላለፉ ረኽስታት፣ ብሓባራዊ ኣጠቓቕማ ጾታዊ መጻወቲታት/ sex toys ክመሓላለፉ ይኽእሉ። ስለዚ፣ኣብ ነፍስ-ወከፍ መጻምድቲ ወይ ውን ነፍስ-ወከፍ ኣፍደገ ኣብ ንቕይረሉ ግዜ፣ ኮንዶም ምቕያር የድሊ። ናይ ጾታዊ ርክብ መጻወቲታት/ sex toys ድማ ብስሩዕ ምዕጋም ወይ ምጽራይ ይግባእ።

ንዝያዳ ሓበሬታታት፣ ኣብዚ ዌብ-ሳይት www.lovelife.ch ኣስዒብኩም ነዚ Safer Sex Check ተወከሱ።

ሓበሬታታት

• መሓበሪ ማእከላት ጾታዊ ጥዕና

ኣሰናዳእቲ፣ 2026 SANTÉ SEXUELLE SUISSE ጾታዊ ጥዕና ስዊዘርላንድ፣ ALECSS፡ ማሕበር ክኢላታት ጾታዊ ጥዕና ብትምህርቲ - ስልጠናን - ምኽርን ስዊዘርላንድ faseg, ማሕበር ጾታዊ ጥዕና ስዊዘርላንድ፣ ትምህርቲ ኣብ ምኽርን ትምህርትን

ሕክምናዊ ገምጋም ናይቲ ኦሪጂናል ጽሑፍ (ፈረንሳኛ)፡ ዶክተር ሳራ ኣርሰቨር (ዩኒቨርሲቲ ጀነቫ፡ ሆስፒታላት ዩኒቨርሲቲ ጀነቫ)

ሕክምናዊ ትርጉምን ምእራምን፣ ብሳባ  ነማሪያም- ናይ ጾታዊ ጥዕና ስፐሻሊስት ብትምህርትን ምኽርን

ብቁጠባዊ ሓልዮት ፌደራላዊ ቤት ጽሕፈት ህዝባዊ ጥዕና (FOPH) ዝተዳለወ ትሕዝቶ።