እቲ ውሽጣዊ ኮንዶም

እቲ ውሽጣዊ ኮንዶም (« ናይ ደቂ-ኣንስትዮ ኮንዶም» ተባሂሉ'ውን ይጽዋዕ) ካብ ስንተቲክ ነገር ዝተሰርሐ ፣ ሳሕቲ ግዜ ካብ ላቴክስ ዝስራሕ ኣብ ውሽጢ ርሕሚ ንኽኣቱ ዝተዳለወ ተዓጻጻፊ ንእሽቶ ከረጺት እዩ። ቅብኣት ዝተለኽየ ኮይኑ ኣብ ነፍስ-ወከፍ ጫፉ ዓንኬል ኣለዎ። ኣብ ውሽጢ እቲ ኮንዶም ዝርከብ ዓንኬል ተንቀሳቓሲ እዩ።

ብኸመይከ ይሰርሕ

እቲ ኮንዶም ኣብ ቦታኡ ምስ በጽሐ፣ ኣብ መንጎ መትሎን ልፋጫዊ ሽፋናትን ቀጥታዊ ርክብ ንኸይህሉ ይከላኸል፣ ከምኡውን ዘርኢ ወዲ ተባዕታይ ናብ ርሕሚ ከይኣቱ ይከላኸል።

እቲ ኮንዶም ብግቡእ ኣብ እንጥቀመሉ እዋን፣ ጥንሲ ንምክልኻልን ካብ ኤይድስ/ኤችኣይቪን።

ኣጠቃቕማ

ናይ ውሽጣዊ ኮንዶም ብግቡእ ምምራጽን ምዕቃብን

• "OK" ወይ "CE" ዝብል ምልክት ጽፈት ዝሕብር ጽሕፈት ዘለዎ ኮንዶም ጥራይ ምጥቃም።
• እቲመጠቕለሊ ናይ ኮንዶም ከም ዘይተበላሸወ ምርግጋጽ። ኣብ ጸሓይ ወይ ኣብ ቁርባበሻ ናይ ገንዘብ ኣይትግደፎም። ኣብ ንእሽቶ ሳንዱቕ መሳሊ ሒዝካዮ ምኻድ ይምረጽ።
• ዕለት ምጥቃም ዝሓለፎ ወይዕለቱ ዝወደቐ ወይ ኤክስፓየር ዝገበረ ኮንዶም ዘይምጥቃም።
• እቲ ውሽጣዊ ኮንዶም ካብ ድኳን SSCH/ le shop SSCH ፣ኣብ ገለ ፋርማሲታት፡ ወይ ኣብ ማእከላት ጾታዊ ጥዕና ክዕደግ ይከኣል እዩ። 

መምርሒ ኣጠቓቕማ

ውጽኢታዊ መታን ክኸውን፡ እቲ ኮንዶም ቅድሚ ዝኾነ ምእታው/penetration ምጅማሩ ክኣቱ ኣለዎ። ቅድሚ ምእታዉ እውን ከይተረፈ እቲ ኣብ ጫፍ ብልዕቲ ዘሎ ፈሳሲ ጸረርታ ወይ ፕረስፐርም፣ ዘርኢ ወይውን ረኽሲ ዘመሓላልፉ ህዋሳት ክህልዎ ይኽእል እዩ።

እቲ ውሽጣዊ ኮንዶም ምውዳይ ኣብ ምቕናዕ ናይ መትሎ ዝምርኮስ ኣይኮነን። ኣቐዲሙ ክውደ ስለ ዝኽእል ድሕሪ ምፍሳስ ዘርኢ ወዲ ተባዕታይ ብቕጽበት ምእላይ ኣየድልዮን እዩ።

ቅድሚ ምእታው ኣብ ውሽጢ እቲ ኮንዶም፣ ካብ ማይ ዝተመስረተ ኣሰራርሓ ወይ ውን ካብ ሲሊኮን ዝተመስርሐ ቅብኣት/ lubrufiant ምልካይ ይከኣል እዩ።

ብኸመይ ይዳሎ፣ 

ነቲ ኣብ ጫፍ ውሽጣዊ ኮንዶም ዝርከብ ውሽጣዊ ቀለቤት ፣ ቀጥ ኣቢልካ ብምሓዝ፣ ብዝተኻእለ መጠን ድማ ናብ ውሽጢ ርሕሚ ኣርሒቕካ ሸተት ኣቢልካ ምእታው ። እቲ ግፍሕ ዝበለ ፣ግዳማዊ ቀለቤት ኣብ ልዕሊ ኣፍ-ርሕሚ ተቐሚጡ ይጸንሕ። 

ኣብ እዋን ምእታው፣ ነቲ መትሎ ኣብ ውሽጢ እቲ ኮንዶም ምምራሕን፣ ነቲ ደጋዊ ቀለቤት ኣብ ልዕሊ ብልዕቲ ብምሓዝን ኣብ ቦታኡ ብውሑስ መንገዲ ንኽጸንሕ ምግባር ።

ነቲ ኮንዶም ንምእላይ ድማ ነቲ ግዳማዊ ቀለቤት ብምጥዋይ እሞ ብቐስታ ምስሓብ።

ድሕሪ ምጥቃም፣ እቲ ኮንዶም ከምዘይተበላሸወ (ከም ዘይተቐደ) ምርግጋጽ።

ኣብ ሽቓቕ ዘይኮነስ ኣብ ጐሓፍ ክድርበ ይግባእ። ነቲ ኮንዶም ሓንሳብ ጥራይ ምጥቃም።

እዚ ጉዳይ ምስ ዘጋጥም...

እቲ ኮንዶም እንተደኣ ተቐዲዱ፣ ሸተት እንተደኣ ኢሉ፣ ወይ (ብግቡእ) እንተዘይተጠቒምናሉ።

ጥንሲ ምሓዝ ንምውጋድ፣ ብዝተኻእለ መጠን ቀልጢፍካ (እንተበዝሐ ክሳብ 120 ሰዓታት ድሕሪ እቲ ስጋዊ ርክብ)፣ ክኒና ናይ ህጹጽ መከላኸሊ ጥንሲ ምውሳድ ይምከር።

ንዝያዳ ሓበሬታታት፣ ህጹጽ መከላኸሊ ጥንሲ

ሓደጋ ምትሕልላፍ ኤችኣይቪ ወይ ኤይድስ እንተ ኣጋጢሙ ፣ ነቲ ህጹጽ ሕክምና (ድሕሪ ምቅላዕ ንምክልኻል / ፕሮፊላክሲ ፖስት አክስፖሲስዮን፣ ፐፕ ናይ ኤይድስ/PEP HIV) ዝውሰድ መድሃኒት ምውሳድ ይከኣል። ንሓደጋ ምትሕልላፍ ኤይድስ/ኤችኣይቪ ብኣድማዒ መንገዲ ንምንካይ፣ ነዚ ክንክን ሕክምና ብዝተኻእለ መጠን ብዝቐልጠፈ እዋን (እንተበዝሔ ክሳብ 48 ሰዓታት ድሕሪ ስጋዊ ርክብ ) ክውሰድ ኣለዎ።

ንዝያዳ ሓበሬታታት፣ ብጾታዊ ርክብ ዝመሓላለፉ ረኽስታት

ኣገዳሲ ሓበሬታታት

• ውሽጣውን ግዳማውን ኮንዶም ኣብ ሓደ እዋን ዘይምጥቃም፣ ምኽንያቱ እቲ ምፍሕፋሕ ምቕዳድ ከስዕብ ስለ ዝኽእል።
• ቅብኣት/lubrifiants፣ ካብ ማይ ወይ ካብ ሲሊኮን ብዝተመስረተ ኣሰራርሓ ዝተዳለወ ቅብኣት ምጥቃም። ስብሒ ዘለዎም ነገራት (ከም እኒ ቫዘሊን፣ ዘይቲ፣ ማርጋሪን ዝእመሰሉ)፣ ጸረ-ዘርኢ ወዲ ተባዕታይ ከምኡ’ውን ናይ ፋንጋል ረኽሲ ፍወሳታት ነቲ ላቴክስ ናይቲ ኮንዶም ከበላሽዎ ይኽእል እዩ። ናይ ርሕሚ ወይ ናይ መሃንቱስ ክሬም ወይ ኦቩል ክንክን ሕክምና ምስ ዝወሃበኩም፣ ምስ ኣጠቓቕማ ኮንዶም ዝሰማማዕ እንተኾይኑ ንሓኪምኩም ምሕታት። እንተ ዘይኮይኑ ኣብ እዋን ሕክምናዊ ክንክን ስጋዊ ርክብ ምውጋድ ይግባእ።
• ንገዛእ ርእስኻ ካብ ኤይድስ/ኤች ኣይ ቪ ወይ ካብ ካልኦት ብጾታዊ ርክብ ዝመሓላለፉ ረኽስታት ክትከላኸለሉ እትኽእለሉ ዝበለጸ መገዲ ፣ ዝያዳ ድሕንነት ዘለዎ ጾታዊ ርክብ/ Safer Sex ዝወሃብ ለበዋታት ምትግባር እዩ። ሓደ ካብቲ ለበዋታት ፣ ብርሕሚ ወይ ብመቐመጫ ምእታው ኣብ ዘለዎ ጾታዊ ርክብ ኮንዶም ምጥቃም እዩ። 
• ብጾታዊ ርክብ ዝመሓላለፉ ረኽስታት፣ ብሓባራዊ ኣጠቓቕማ ጾታዊ መጻወቲታት/ sex toys ክመሓላለፉ ይኽእሉ። ኮንዶም ምጥቃም (ኣብቲ ናይ ጾታዊ ርክብ መጻወቲ ናይ ግዳማዊ ኮንዶም ወይ ኣብ ርሕሚ ውሽጣዊ ኮንዶም ምጥቃም፣ ግናኸ ክልቲኡ ኣብ ሓደ እዋን ዘይምጥቃም) ናይ ጾታዊ ርክብ መጻወቲታት/ sex toys ድማ ብስሩዕ ምዕጋም ወይ ምጽራይ ይግባእ።

ንዝያዳ ሓበሬታታት ፣ ኣብዚ ዌብ-ሳይት www.lovelife.ch ኣስዒብኩም ነዚ Safer Sex Check ተወከሱ።

ሓበሬታታት

• መሓበሪ ማእከላት ጾታዊ ጥዕና

ኣዳለውቲ፣ 2026 SANTÉ SEXUELLE SUISSE ጾታዊ ጥዕና ስዊዘርላንድ፣ ALECSS፡ ማሕበር ክኢላታት ጾታዊ ጥዕና ብትምህርቲ - ስልጠናን - ምኽርን ስዊዘርላንድ faseg, ማሕበር ጾታዊ ጥዕና ስዊዘርላንድ፣ ትምህርቲ ኣብ ምኽርን ትምህርትን. 

ሕክምናዊ ገምጋም ናይቲ ኦሪጂናል ጽሑፍ (ፈረንሳኛ)፡ ዶክተር ሳራ ኣርሰቨር (ዩኒቨርሲቲ ጀነቫ፡ ሆስፒታላት ዩኒቨርሲቲ ጀነቫ)

ሕክምናዊ ትርጉምን ምእራምን፣ ብሳባ  ነማሪያም- ናይ ጾታዊ ጥዕና ስፐሻሊስት ብትምህርትን ምኽርን

ብቁጠባዊ ሓልዮት ፌደራላዊ ቤት ጽሕፈት ህዝባዊ ጥዕና (FOPH) ዝተዳለወ ትሕዝቶ።